Beskrywing

677 Hornbill is 'n klein 2-slaapkamer-lodge in die Marloth Park Conservancy. Dié wildlandgoed is baie gewild en grens aan die Suidelike Krugerwildtuin. Hier loop wilde diere steeds vry rond en daaglikse besoeke van diere soos vlakvarke, sebras, koedoes, kameelperde en meer is algemeen.

Dié huis het 2 baie ruim en suite-slaapkamers wat elkeen individueel lugversorging het vir jou gerief. Die boonste kamer het 'n dubbelbed terwyl die onderste kamer 'n dubbelbed sowel as 'n enkelbed het. Alle linne, handdoeke en geriewe word voorsien en daaglikse skoonmaakdienste is beskikbaar.

'n Klein TV-sitkamer is beskikbaar met 'n slaapbank vir kleiner kinders. Daar is 'n DStv-koppelpunt, gaste moet egter hul eie dekodeerder en slimkaart saambring. OpenView DStv is beskikbaar. Wi-Fi is gratis.

Die moderne kombuis is volledig toegerus vir selfsorg.

Buite is 'n onderdak ingeboude braai. Daar is ook 'n plonspoel en 'n lapa-braai-area as jy saans om die vuur wil sit en luister na die geluide van die bos.